इटहरी । नेकपा एमाले जिल्ला कमिटी उदयपुरले साफ महिला फुटबल प्रतियोगितामा नेपाली राष्ट्रिय टोलीबाट खेल्ने उदयपुरका खेलाडीहरुलाई सम्मान गरेको छ । एमाले जिल्ला कमिटीले बिहीबार साफ प्रतियोगितामा खेल्ने उदयपुरका दुई खेलाडीलाई नागरिक अभिनन्दन सहित सम्मान गरेको हो । फुटवल खेलाडीहरु अमिसा कार्की र सविता थापा मगरलाई बाजा गाजा सहित सदरमुकाम गाईघाट बजार परिक्रमा सहित अभिन्दन र सम्मान गरिएको एमाले उदयपुरका अध्यक्ष भागवत राउतले जानकारी दिनु भयो । उदयपुर गृहजिल्ला भएका खेलाडीहरु अमिसा कार्की त्रियुगा नगरपालिका ५,  सविता थापा मगर रौतामाई गाउँपालिका ५ र हिरा भुजेल कटारी नगरपालिका ५ का स्थायी बासिन्दा भएका खेलाडीहरु हुन । हिरा भुजेल खेलको क्रममा घाईते भई अस्पतालमा उपचाररत रहेकाले सम्मान कार्यक्रममा उपस्थित नभएको बताइएको छ ।  सो क्रममा उदयपुर जिल्ला निर्वाचन क्षेत्र नं २ का प्रतिनिधि सभा सदस्य अम्बर बहादुर रायमाझी र संविधान सभा सदस्य मन्जु कुमारी चौधरीले राष्टिय झाण्डा ओडाएर खेलाडीहरुलाई सम्मान गर्नु भएको थियो ।