_1692346234_1692579957_1696057934.jpg)
इटहरी / इटहरी लेडी जेसीजले अन्तर्राष्ट्रिय तेक्वान्दो खेलाडी सुशीला राईलाई सम्मान गरेको छ। राईलाई खेलकुद क्षेत्रमा पुर्याएको योगदान र अन्तर्राष्ट्रिय स्तरमा नेपालको नाम उजागर गरेबापत इटहरी लेडी जेसीजले आफ्नो २३औँ वार्षिकोत्सवको अवसर पारेर नगदसहित सम्मान गरेको हो।
राई इटहरी उपमहानगरपालिका-२०, तरहराकी बासिन्दा हुन्। उनले अन्तर्राष्ट्रिय तेक्वान्दो खेलाडीका रूपमा देशको प्रतिष्ठा बढाउँदै १३औँ साफ च्याम्पियनसिपमा स्वर्ण पदक जितेकी छन्। तेक्वान्दो खेलमा मात्र नभई उनी अन्तर्राष्ट्रिय निर्णायकका रूपमा पनि आफ्नो पहिचान स्थापित गर्न सफल भएकी छन्।
कार्यक्रम मंगलबार आयोजना गरिएको थियो। कार्यक्रममा प्रमुख अतिथिका रूपमा कोशी प्रदेश सरकारका पर्यटन, वन तथा वातावरण मन्त्री सदानन्द मण्डल उपस्थित थिए। उनले राईलाई इटहरी लेडी जेसीजकी अध्यक्ष इन्दिरा काफ्लेसँगै सम्मान प्रदान गरे।
कार्यक्रमका क्रममा प्रमुख अतिथि मण्डलले सुशीला राईजस्ता खेलाडीहरूले देशलाई अन्तर्राष्ट्रिय स्तरमा चिनाउने काम गरेको भन्दै प्रशंसा गरे। उनले खेलकुद क्षेत्रमा सरकारको तर्फबाट आगामी दिनमा थप सहयोग र प्रोत्साहन उपलब्ध गराउने प्रतिबद्धता पनि जनाए।
यसै अवसरमा, इटहरी लेडी जेसीजले अन्य विशिष्ट व्यक्तिहरूलाई पनि सम्मान गर्यो। नेपाल टेलिभिजन इटहरीका प्रमुख वसन्त रुपाखेतीलाई सञ्चार क्षेत्रको विकासमा पुर्याएको योगदानका लागि सम्मान गरिएको थियो। साथै, संघर्षशील एकल महिला सरस्वती श्रेष्ठ खुलाललाई पनि समाज सेवामा पुर्याएको योगदानको कदर गर्दै सम्मान प्रदान गरिएको अध्यक्ष इन्दिरा काफ्लेले जानकारी दिइन्।
कार्यक्रमले खेलकुद, सञ्चार, र समाजसेवा क्षेत्रका व्यक्तित्वहरूको योगदानलाई सम्मान गर्दै समाजमा सकारात्मक प्रेरणा दिने उद्देश्य राखेको थियो। इटहरी लेडी जेसीजको यस पहलले स्थानीय स्तरमा मात्र नभई राष्ट्रिय स्तरमा पनि उदाहरणीय कार्यको सन्देश प्रवाह गरेको छ।
