इटहरी । २५ औं संस्करणको बढासुब्बा गोल्डकपको उपाधी जितेसँगै न्युरोड टिम (एनआरटी)ले उपाधीमा ह्याटिक गरेको छ । शनिबार धरान रंगशालमा भएको फाइनल खेलमा चर्च ब्वाइज युनाइटेडलाई २(१ ले पराजित गर्दै एनआरटीले उपाधीमा ह्याटिक गरेको हो । एनआरटीले १० औं संस्करण र २४ औं संस्करणमा पनि बुढासुब्बा गोल्डकपको उपाधी जितेको थियो । उपाधीसँगै एनआरटीले नगद १० लाख पुरस्कार प्राप्त गर्दा उपविजेता भएको चर्च ब्वाइजले नगद ५ लाख पुरस्कार जितेको छ । प्रतिष्पर्धात्मक खेलमा अग्रता भने चर्च ब्वाइजले लिएको थियो । खेलको २४ औं मिनेटमा रोहन कार्कीको फ्रिकिकलाई कप्तान अनन्त तामांगले हेड गोल गरेका थिए । गोल खाएको तीन मिनेट नबित्दै एनआरटीले बराबरी गर्यो । खेलको २७ औं मिनेटमा एनआरटीका रोबर्टले प्रहार गरेको कर्नरमा चर्च ब्वाइजका गोल किपर क्रिसल मोक्तानले पञ्च गर्न नसक्दा डिबक्स भित्र रुमल्लिएको बललाई हेनरी पोकोले जाली चुमाएका थिए । खेलको म्यान अफ द म्याच एनआरटीका हेनरी पोको घोषित भए । उनलाई नगद १० हजार पुरस्कार प्रदान गरिएको थियो । हेनरीले नै एनआरटीका लागी दोस्रो गोल गरे । खेलको ५८ औं मिनेटमा चर्च ब्वाइजका डिफेन्स डिका सेर्गेबाट बल खोस्दै उनले उत्कृष्ट गोल गरेका थिए । व्यक्तिगत विधातर्फ पनि एनआरटीले बर्चस्व कायम गरेको छ । प्रतियोगिताको सवोत्कृष्ट खेलाडी एनआरटीका शिशिर लेखी घोषित भए । उनलाई नगद एक लाख पुरस्कार प्रदान गरिएको थियो । प्रतियोगिताको बेष्ट फरवार्ड चर्च ब्वाइजका समिर तामांग, बेष्ट गोल किपर एनआरटीका प्रमिजय गच्छदार, बेष्ट डिफेन्डर चर्च ब्वाइजका पदम भट्टराई, बेष्ट मिड फिल्डर, चर्च ब्वाइजका रोहन कार्की, बेष्ट कोच एनआरटीका हरिओम श्रेष्ठ, हाइ स्कोर चर्चब्वाइजका खेलाडी द्धय समिर तामांग र अर्माण्ड भिदोंग घोषित भए । उनीहरुले समान ३ गोल गरेका थिए ।