इटहरी | भारतीय सेनाको गौरवशाली गोरखा पल्टनमध्ये एक पाँच एघार गोरखा राइफल्स (बोग्रा) को ७७ औं स्थापना दिवसको अवसरमा इटहरीमा भव्य भेटघाट कार्यक्रम सम्पन्न भएको छ। यस विशेष कार्यक्रमले सेवा निवृत्त गोरखा सैनिकहरूबीचको सम्बन्धलाई पुनः जीवन्त बनाउँदै, इतिहास, योगदान र एकताको भावना झल्काएको छ।

इटहरीको साग्रीला होटल एण्ड ट्रि हाउसमा सम्पन्न उक्त कार्यक्रममा दुई सयभन्दा बढी सेवा निवृत्त भारतीय गोरखा सैनिकहरूको उपस्थिति रहेको थियो। कार्यक्रम सुवेदार लाल बहादुर राईको अध्यक्षतामा सम्पन्न भएको हो भने कार्यक्रम संयोजनको भूमिका हनेरी क्याप्टेन संजीव राईले निर्वाह गर्नुभएको थियो। कार्यक्रम सञ्चालनको जिम्मेवारी डिल्लीराज राउतले सम्हाल्नुभएको थियो ।

कार्यक्रमको प्रमुख उद्देश्य भनेको विभिन्न समयमा, विभिन्न स्थानहरूमा सेवा गरिसकेका र हाल सेवा निवृत्त अवस्थामा रहेका सैनिकहरूबीच आत्मीय सम्बन्धलाई अझ प्रगाढ बनाउने, पुराना सम्झनाहरू बाँड्ने तथा भावी पुस्तालाई प्रेरणादायी सन्देश दिनु रहेको संयोजक संजीव राईले बताए।

कार्यक्रममा सहभागी सैनिकहरूले आफ्नो सेवाकालको अनुभव, चुनौती र गौरवका क्षणहरू साझा गरेका थिए। साथै, यस्ता कार्यक्रमहरूले आफूहरूबीचको आत्मीयता अझ बलियो बनाउने महसुस गराएको उनीहरूले बताएका छन् ।

कार्यक्रममा गोरखा राइफल्स पल्टनको गौरवपूर्ण इतिहास, वीरता र बलिदानको सम्झना गरिएको थियो। वक्ताहरूले गोरखा सैनिकहरूको अनुशासन, साहस र समर्पणको उच्च मूल्याङ्कन गर्दै वर्तमान पुस्ताले पनि ती आदर्शलाई आत्मसात गर्नुपर्नेमा जोड दिएका थिए।

उक्त कार्यक्रमले गोरखा समुदायभित्रको आपसी सद्भाव, सहकार्य र पारिवारिक सम्बन्धलाई थप मजबुत बनाउन सहयोग पु¥याएको सहभागीहरूको धारणा थियो।

भेटघाट कार्यक्रममा भावी दिनहरूमा अझ व्यवस्थित र नियमित रूपमा यस्ता कार्यक्रमहरू आयोजना गरिने प्रतिबद्धता पनि व्यक्त गरिएको थियो। सहभागीहरूले केवल पुराना सम्झनाहरू बाँड्न मात्र होइन, आपसी सहयोग र सहकार्यलाई निरन्तरता दिन समेत जोड दिएका थिए।

कार्यक्रमको अन्त्यमा सामूहिक भोजनको आयोजना गरिएको थियो, जसले सहभागीहरूको आपसी आत्मीयता र सम्बन्धलाई थप बलियो बनाएको थियो। पारिवारिक वातावारणमा सम्पन्न भएको कार्यक्रममा सहभागीहरूले गहिरो सन्तोष र खुशी व्यक्त गरेका थिए।

निष्कर्षमा, पाँच एघार गोरखा राइफल्सको ७७ औं स्थापना दिवसका अवसरमा इटहरीमा आयोजित यो भव्य भेटघाट कार्यक्रमले केवल सैनिकहरूबीचको भेट मात्र नभई, भावनात्मक सम्बन्ध, गौरवको इतिहासको सम्मान, र एकताको भावना अभिव्यक्त गर्ने महत्वपूर्ण अवसर प्रदान गरेको सहभागीहरूको भनाइ रहेको छ।