इटहरी । नेपाल पत्रकार महासंघ संखुवासभा शाखाले बडादशैं, तिहार, नेपाल सम्वत र छठ पर्वको अवसरमा शुभकामना आदानप्रदान तथा चियापान कार्यक्रमको आयोजना गरेको छ । शुक्रबार सदरमुकाम खाँदबारीस्थित उद्योग वाणिज्य संघको हलमा कार्यक्रमको आयोजना गरेको हो । कार्यक्रमलाई सम्बोधन गर्दै प्रमुख अतिथि सुमन शाक्यले सबै नेपालीहरुलाई शुभकामना दिदै. जेनजीको माग अनुसार सुशासन कायम गर्न र भष्टाचारको अन्त्य गर्न लाग्नुपर्ने बताउनुभयो । मुलुकका राजनैतिक दलका नेता मात्रै होइन, कर्मचारीहरुका कारण पनि भष्टाचार बढेको उहाँले बताउनुभयो । त्यसैगरि खाँदबारी नगरपालिकाका मेयर महेश थपलियाले जेनजीले मुलुकको आवश्यकता अनुसारको माग उठाएको बताउनुभयो ।

उहाँले खाँदबारी नगरपालिकाका सम्पूर्ण गतिविधीहरु पारदर्शी ढंगले काम गर्न जेनजीको माग अनुसार प्रतिबद्धता पत्र सार्वजनिक गरिसकेको बताउर्दै भष्टाचारको अन्त्य गरि सुशासन कायम गर्न आफू लागि परेको बताउनुभयो । त्यसैगरि संखुवासभाका प्रमुख जिल्ला अधिकारी सिर्जना थपलियाले चाडवाडको समयमा कुनै पनि अप्रिय घटनाहरु नघटोस, बजारमा कालोबजारी नहोस भनेर सुरक्षा संयन्त्रलाई परिचालन गरिएको जानकारी दिनुभयो । नेपाल पत्रकार महासंघका अध्यक्ष कृष्णराज शाक्यले मुलुकको परिवर्तनको अवस्थालाई आत्मसाथ गरि राजनैतिक दल, नागरिक समाज लगायत सबै एकजुट भएर जानुपर्ने उद्धेश्यले कार्यक्रमको आयोजना गरिएको बताउनुभयो । उक्त कार्यक्रममा राजनीतिक दलका प्रतिनिधिहरू, स्थानीय निकायका प्रमुख जनप्रतिनिधिहरू, सरकारी कार्यलयका प्रमुख तथा प्रतिनिधि, उद्योगी, व्यापारी, सामाजिक संघसंस्था, नागरिक समाज र महासंघका पदाधिकारी लगायतको उपस्थिति रहेको थियो ।