_1692346234_1692579957_1696057934.jpg)
इटहरी: इटहरीमा एक दशक देखि होटल गरेका जीवन पराजुलीलाई यो वर्षको चुनावी माहोल महसुस भएको छैन। सडकमा र घरघरमा चुनावी माहोल तातेपनी होटल व्यवसायमा त्यस्तै माहोल नभएको पराजुली बताउँछन् ।
होटल व्यवसायी संघ इटहरीका अध्यक्ष तथा इटहरीको टुरिष्ट क्लास होटल इनटुरिष्टका संचालक पराजुलीले पछिल्ला चुनाव जस्तो कारोबार नभएको सुनाउछन् । भन्छन्, 'दोश्रो संविधानसभा देखि गत स्थानीय हुँदै प्रदेश र संघ चुनावको माहोल अर्कै थियो। अहिले छैन।' आफ्नो मात्रै होईन इटहरीका टुरिष्ट क्लासमा १५ र अरु करिब २०० होटलको यस्तो अवस्था रहेको पराजुली बताउछन् ।
'साना होटल र चिया पसलमा कारोबार बढेको होला तर ठूलो र टुरिष्ट क्लास होटलमा त्यो छैन।" पराजुलीले साना होटल र चिया पसलमा कारोबार बढेको बताए पनि इटहरी ६ संगीत चोकको खनाल चिया पसल संचालिका ज्योतिका दाहाल खनाल भने धेरै कारोबार नभएको बताउछिन् । उनी भन्छिन् ,"अरु दिन भन्दा मनोनयनपछी केही चहलपहल त बढ्यो । तर, अघिल्ला चुनाव जस्तो व्यापार छैन।
" इटहरीका चिनिएका ग्राफिक्स डिजाइनर प्रकाश नेपालको चुनावी अनुभव उत्तिकै निराशजनक छ। इटहरीमा बिगत एक दशकबाट ग्राफिक्स क्षेत्रमा सक्रिय तथा सुनसरी ग्राफिक्सका संचालक नेपाललाई कामको धेरै चाप छैन।
प्रदेश १ को व्यापारीक चौरास्ता इटहरीमै व्यापार नहुनुले प्रदेशका सबै क्षेत्रमा यस्तै प्रभाव भएको बताउँछन् इटहरीका युवा कपडा व्यापारी गोपाल श्रेष्ठ । इटहरीको वन्स रेडिमेटका संचालक श्रेष्ठ भन्छन्, "हाम्रो व्यापार प्रदेश १ का पाहाडी जिल्लामा हुन्छ। तर, अहिले राम्रो माग छैन। व्यापार छैन।"
