_1692346234_1692579957_1696057934.jpg)
धरान : धरानस्थित निर्वाचन अधिकृतको कार्यालयमा दलका नेतालाई खटाएको भन्दै जिल्ला निर्वाचन कार्यालयमा उजुरी परेको छ ।
क्षेत्रीय कारागार झुम्का कारागारमा कार्यरत मणिराज पोखरेललाई निर्वाचन कार्यालयमा खटाइएको छ । उनी नेकपा समाजवादी पार्टीका जिल्ला सचिवालय सदस्य भएको बताइएको छ । कर्मचारीहरू कुनै पनि दलमा आबद्ध हुन नहुने कानुन भए पनि उनी दलसँग आबद्ध भएको पाइएको छ । दलका जिम्मेवार व्यक्तिलाई निर्वाचनमा खटाउँदा निष्पक्षता माथि प्रश्न उठ्छ ।
दलका जिम्मेवार व्यक्ति चुवानमा खटाइएको विषयमा जिल्ला निर्वाचन कार्यालय सुनसरीमा नेकपा एमाले जिल्ला कमिटी सुनसरीले गत १५ गते उजुरी दिइएको थियो । तर उजुरीको विषयमा आयोग तथा जिल्ला प्रशासन कार्यालयले कुनै सुनुवाइ नगरेको एमालेले जनाएको छ ।
प्रमुख जिल्ला अधिकारी इन्द्रदेव यादवले उनी पार्टीमा भएको भन्ने उजुरी आएको बताए । ट्रेड युनियनमा भएका कर्मचारीहरूलाई भने हामीले व्यवस्थापन गरेका छौँ । कुनै पनि कर्मचारी दलसँग आबद्ध हुन नपाइने कानुनमा छ । बराह क्षेत्रमा खटिनु भएका एक कर्मचारी ट्रेड युनियनमा भएको पाइए पछि फिर्ता बोलाइएको उनले बताए ।
निर्वाचन कार्यालय धरानका निर्वाचन अधिकृत पुष्करराज नेपालले यस विषयमा उनी दलसँग आबद्ध नभएको पाइएको बताए । उजुरी आए पछि उनलाई निगरानीमा राखेर काममा खटाइएको उनले बताए ।
