_1692346234_1692579957_1696057934.jpg)
इटहरी । स्वतन्त्र विद्यार्थी यूनियन (स्ववियू) जनता बहुमुखी क्याम्पस, इटहरीले बुधबार विशेष कार्यक्रमका बीच आफ्नै भवनको उद्घाटन गरेको छ । उक्त अवसरमा इटहरी उपमहानगरपालिका मेयर हेमकर्ण पौडेलसहित पाँच जना पूर्व स्ववियू सभापतिहरूलाई सम्मान गरिएको हो ।
सम्मानित हुनेहरूमा मेयर पौडेलसँगै उमेश पौडेल, राजकुमार सापकोटा, किशोर कोइराला र रमेशकुमार पोखरेल रहेका छन् ।स्ववियू भवन इटहरी उपमहानगरपालिका र जनता बहुमुखी क्याम्पसको संयुक्त लगानीमा निर्माण गरिएको हो । नगरपालिकाले १० लाख रुपैयाँ सहयोग गरेको र क्याम्पसले थप रकम बेहोरेर भवन निर्माण सम्पन्न गरेको हो । नयाँ भवनमा एउटा हलसहित तीनवटा कोठा रहेका छन् ।
भवनको संयुक्त उद्घाटन मेयर पौडेल र क्याम्पस सञ्चालक समितिका अध्यक्ष विकास केसीले गर्नुभयो । यस अवसरमा निजी शिक्षालय विश्व आदर्श कलेजले खानेपानीका ट्याङ्की तथा पिउने पानीको व्यवस्था स्ववियू भवनका लागि उपलब्ध गराएको छ ।
कार्यक्रममा स्ववियू सभापति सहदेव काफ्लेले नयाँ भवनले विद्यार्थीहरूको आवश्यकता पूरा गर्ने, उनीहरूको समस्या र अधिकार अगाडि बढाउन सहज हुने विश्वास व्यक्त गर्नुभयो ।
प्रमुख अतिथि मेयर पौडेलले राजनीतिक संस्कार विकृत ढंगले अघि बढेको बताउँदै विद्यार्थीले यसलाई सही बाटोमा लैजानुपर्नेमा जोड दिनुभयो । उहाँले अध्यक्ष विकास केसीको नेतृत्वमा जनता बहुमुखी क्याम्पसले उल्लेख्य प्रगति गरेकोमा प्रसंसा गर्नुभयो ।
सो अवसरमा क्याम्पस प्रमुख डा. गीता अधिकारी, विश्व आदर्श कलेजका अध्यक्ष लेखनाथ घिमिरे, प्रिन्सिपल गणेश दुलाल, विभिन्न राजनीतिक दलका प्रतिनिधि, क्याम्पस संगठनका सदस्य, समाजसेवी, प्रहरी, शिक्षक तथा विद्यार्थीहरूको उपस्थिति रहेको थियो ।
