_1692346234_1692579957_1696057934.jpg)
मोरङ । जेन्जी आन्दोलनका क्रममा घाइते भएका बुढीगंगा गाउँपालिका–७ बेलडाँगी निवासी सन्तनु ढकाललाई कोशी प्रदेशकी सांसद मिना श्रेष्ठले भेट गरेकी छन् ।
सांसद श्रेष्ठले ढकालको घरमै पुगेर उनको स्वास्थ्य अवस्थाबारे जानकारी लिइन् । भेटका क्रममा श्रेष्ठले जेन्जी आन्दोलनमा घाइते भएका सबैको उपचार सुनिश्चित गर्न प्रदेश सरकारसँग पहल गर्ने प्रतिबद्धता जनाइन् ।
उनले भनिन्, “शान्तिपूर्ण आन्दोलनमा सहभागी युवाहरू घाइते हुनु दुखद् विषय हो । उनीहरूको उपचार र न्यायका लागि प्रदेश सरकार जिम्मेवार बन्नुपर्छ ।” सांसद श्रेष्ठले आन्दोलनमा घाइते भएका सबै व्यक्तिहरूको अवस्थाबारे प्रत्यक्ष जानकारी लिने र आवश्यक सहयोग पुर्याउने बताइन् ।
जेन्जी आन्दोलनका क्रममा प्रदर्शनमा सहभागी भएका सन्तनु ढकाल गम्भीर घाइते भएका थिए । अहिले उनी उपचारपश्चात घरमै आराम गरिरहेका छन् । स्थानीय बासिन्दा तथा परिवारका सदस्यहरूले सांसद श्रेष्ठको भेट र सहयोगप्रति आभार व्यक्त गरेका छन् ।
जेन्जी आन्दोलन केही महिनाअघि प्रदेशका विभिन्न जिल्लामा फैलिएको थियो । आन्दोलनका क्रममा प्रहरी र प्रदर्शनकारीबीच झडप हुँदा कैयौं युवा घाइते भएका थिए । आन्दोलनको माग सम्बोधन नहुँदा स्थानीय युवाहरू अझै पनि असन्तुष्टि व्यक्त गर्दै आएका छन् ।
प्रदेश सांसद मिना श्रेष्ठले आन्दोलनका घाइतेहरूलाई भेटेर नैतिक र मानवीय सन्देश दिएको स्थानीयहरूले बताएका छन् ।
