_1692346234_1692579957_1696057934.jpg)
पाँचथर — जारी ८औं तरुण गोल्डकप फुटबल प्रतियोगितामा कुम्मायक गाउँपालिकाले उत्कृष्ट प्रदर्शन गर्दै फाइनलमा स्थान सुरक्षित गरेको छ। बिहीबार सम्पन्न पहिलो सेमिफाइनलमा कुम्मायकले फाल्गुनन्द गाउँपालिकालाई पराजित गर्दै उपाधि नजिक पुगेको हो।
कुम्मायकका लागि दिल सम्हाम्फेले दुई गोल गर्दै टोलीलाई जित दिलाए। दुबै गोल सुशिल लावतीको पासमा आएका थिए। खेलको पहिलो हाफमै आक्रमक सुरुवात गरेको कुम्मायकले बलमा नियन्त्रण राख्दै लगातार अवसर सिर्जना गर्यो। फाल्गुनन्दका खेलाडीहरूले रक्षा मजबुत बनाउने प्रयास गरे पनि कुम्मायकको संयोजन र तालमेल बलियो रह्यो।
दोस्रो हाफमा पनि कुम्मायकले खेलको लय आफ्नो पक्षमा राख्न सफल रह्यो। सुशिल लावतीको मिडफिल्ड नियन्त्रण र तीव्र पासिङले खेलको दिशा नै निर्धारण गर्यो। दिल सम्हाम्फेको पहिलो गोलले टोलीमा आत्मविश्वास थपिएको थियो भने दोस्रो गोलले जित सुनिश्चित गर्यो।
फाल्गुनन्दले केही अवसर सिर्जना गरे पनि फिनिशिङमा कमजोरीका कारण गोल गर्न असफल रह्यो। खेलभरि कुम्मायकको अनुशासित र संयमित प्रदर्शन नै जितको मुख्य कारण बन्यो।
