_1692346234_1692579957_1696057934.jpg)
काठमाडौं | नेपाली कांग्रेसका केन्द्रीय सदस्य तथा नेपाल विद्यार्थी संघ (नेविसंघ) का निवर्तमान केन्द्रीय अध्यक्ष राजीव ढुंगानाले पार्टीलाई साँच्चिकै युवामुखी र गतिशील बनाउने समय आएको बताएका छन्।
नेपाली कांग्रेसको चालू केन्द्रीय समिति बैठकमा शनिबार आफ्ना धारणा प्रस्तुत गर्दै उनले पार्टीभित्र युवाको सहभागिता संस्थागत गर्नुपर्नेमा जोड दिएका हुन्।
ढुंगानाले भने, “कांग्रेस मुखले मात्र युवामय भयो भनेर हुँदैन, त्यसको व्यवहारमा पनि प्रमाण देखिनुपर्छ। त्यसका लागि अब पार्टीको विधानमै प्रावधान राख्नुपर्छ — पुराना क्रियाशील सदस्यताको २० प्रतिशत भाग ३० वर्षमुनिका युवाका लागि अनिवार्य रूपमा छुट्याइयोस्।”
उनले पार्टीको संगठन र निर्णय प्रक्रियामा युवाको नेतृत्व विकास नभएसम्म कांग्रेस पुरानो सोचमै सीमित रहने खतरा रहेको चेतावनी दिए।
ढुंगानाको भनाइमा, “नेपाली कांग्रेसले आफ्ना इतिहासमा लोकतन्त्रको जग बसालेको पार्टी हो, तर अहिले युवाहरू पार्टीबाट टाढा भइरहेका छन्। तिनलाई फर्काउन कांग्रेसले साहसिक निर्णय गर्नैपर्छ।”
ढुंगानाले देशको वर्तमान राजनीतिक र आर्थिक अवस्था निकै नाजुक रहेको टिप्पणी गर्दै कांग्रेसले अब निर्णायक नेतृत्व लिनुपर्ने बताएका छन्।
उनका अनुसार, “देशको अवस्था गम्भीर छ। बेरोजगारी, भ्रष्टाचार र असन्तोष बढ्दो छ। जनता निराश छन्। अब कांग्रेसले देशलाई उज्यालो दिशातर्फ लैजान निर्णायक भूमिका खेल्नुपर्छ।”
उनले थपे, “२०८४ सालको निर्वाचनमा गठबन्धन गर्ने कि नगर्ने भन्ने विषयमा अलमलिनु हुँदैन। कांग्रेसले जनताका आकांक्षा बुझेर ठोस निर्णय गर्नुपर्छ। देशलाई निकास दिन कांग्रेस अघि बढ्नैपर्छ।”
ढुंगानाले सरकारलाई समेत भ्रष्टाचार नियन्त्रणमा कडा प्रतिबद्धता देखाउन आग्रह गरे। उनले भने, “भ्रष्टाचार आज देशको सबैभन्दा ठूलो रोग हो। यसलाई नियन्त्रण नगरी देश अघि बढ्न सक्दैन। सरकार र दलहरू सबैले यस विषयमा साझा प्रतिवद्धता देखाउनुपर्छ।”
हालै भदौ २३ र २४ गते भएको जेन–जी(Gen Z) आन्दोलनले देशको राजनीतिक वृत्तलाई हल्लाइदिएको उल्लेख गर्दै ढुंगानाले नेताहरूले त्यसबाट गहिरो आत्ममूल्यांकन गर्नुपर्ने बताएका छन्।
उनका शब्दमा, “जेन–जेड आन्दोलनले युवा पुस्ताको असन्तोष, निराशा र राजनीतिक प्रणालीप्रति उठेको अविश्वास प्रकट गरेको छ। यो चेतावनी हो — पुरानो सोच र शैलीले अब काम गर्दैन। नेताहरूले समयको माग अनुसार रूपान्तरण हुनैपर्छ।”
ढुंगानाले युवाहरूलाई सडकमा मात्रै होइन, संगठनभित्र पनि अर्थपूर्ण स्थान दिनुपर्नेमा जोड दिए। “युवा ऊर्जालाई सकारात्मक बाटोमा लैजान पार्टीभित्रै अवसर र भूमिकाको ढोका खोल्नुपर्छ,” उनले भने।
राजीव ढुंगानाले कांग्रेसभित्र आन्तरिक सुधार र पारदर्शी नेतृत्व चयन प्रणाली विकास गर्नुपर्ने आवश्यकता पनि औंल्याए। उनले भने, “कांग्रेसले विगतका आन्दोलनहरूमा नेतृत्व दिएको गौरवशाली इतिहास छ, तर अहिले संगठन कमजोर बन्दै गएको छ। अहिलेको चुनौती पार्टीको एकता र जनविश्वास पुनःस्थापित गर्नु हो।”
उनका अनुसार, युवाले पार्टीप्रतिको विश्वास पुनः हासिल गर्न सके मात्र कांग्रेस पुनः जनताको मनमा ठाउँ बनाउन सक्छ।
ढुंगानाले संगठनभित्रको गुटबन्दी, अवसरवाद र सत्तामुखी राजनीतिलाई अन्त्य गरी विचार र सिद्धान्तमा आधारित नयाँ शैलीको राजनीति विकास गर्नुपर्ने धारणा राखे।
ढुंगानाको धारणा अनुसार, नेपाली कांग्रेस अहिले मोडमा उभिएको छ — जहाँ पुरानो सोच र नयाँ पुस्ताको आकांक्षाबीचको पुल बनाउन आवश्यक छ।
उनले जोड दिए, “यदि कांग्रेसले युवालाई नेतृत्वको अग्रपंक्तिमा ल्याउन सक्यो भने पार्टी पुनः जनताको पहिलो रोजाइ बन्न सक्छ। त्यसका लागि विधान, नीतिगत दृष्टि र व्यवहार सबैमा सुधार आवश्यक छ।”
