‘प्रतिगामी षडयन्त्रविरुद्ध’ नेकपा एमालेले कोशी प्रदेशका १३७ वटै पालिकामा जनप्रदर्शन गर्दै ।

सुन्दरहरैचा। नेकपा एमालेको जनपरिचालन कार्यक्रम अन्तर्गत आज मंगलबार देशभरका ७ सय ५३ पालिकामा जनप्रदर्शन हुँदैछ । त्यसै अन्तर्गत कोशी प्रदेशका पनि १३७ ओटै पालिकामा प्रतिगामी षडयन्त्र विरुद्ध एमालेले  जनपरिचालन गर्ने निर्णय गरेअनुसार वडा, पालिका, जिल्ला र राष्ट्रिय रुपमा जनप्रदर्शनका कार्यक्रम अगाडि बढाएको हो ।

यसअघि कात्तिक २२ गते देशका ६ हजार ७ सय ४३ वटै वडामा वडा भेला भइसकेका छन् । भेलामा भदौ २४ गतेपछि विकसित राजनीतिक घटनाक्रम, संसदको गैरसंवैधानिक विघटन र एमालेको आगामी बाटोका बिषयमा कार्यकर्ताहरुलाई प्रष्ट पारिएको नेकपा एमाले केन्द्रीय सदस्य तथा कोशी प्रदेश इन्चार्ज शेरधन राईले बताउनुभयो ।

आज मंगलबारको कार्यक्रममा कतिपय पालिकाले मोटरसाइकल र्यालीमार्फत एमालेको शक्ति प्रदर्शन गर्दैछन् भने कतिपय पालिकाका केन्द्रमा नारा जुलुससहितका कार्यक्रम राखिएको छ । कार्यक्रममा जनतालाई जगाउने नाराहरु पार्टी केन्द्रले तय गरेको छ । सभा, सम्मेलन, धान काट्ने कार्यक्रम साथै विभिन्न सामाजिक कार्यक्रमहरूका साथ अघि बढिरहेको कोशी प्रदेश अध्यक्ष घनश्याम खतिवडाले बताउनुभयो।

प्रदर्शन भव्य बनाउन हरेक सहभागीले एमालेको झण्डासहित जनप्रदर्शनमा सहभागी हुने, जनप्रदर्शन घना बस्ती भएको ठाउँमा गर्ने, जनप्रदर्शनको अन्त्यमा छोटो कोणसभा गर्ने र कोण सभामा वर्तमान राजनीतिक अवस्थाका बारेमा स्पष्ट पार्न नेताहरुलाई एमालेले निर्देशन गरेको छ । जनप्रदर्शनका तस्विर, भिडियो र मुख्य विषयवस्तु हरेक सदस्यले सामाजिक सञ्जालमा शेयर गर्न र सञ्चार माध्यमहरुमा पठाउन पनि एमालेले यसअघि नै पार्टी महासचिव शंकर पोखरेलले निर्देशन गरिसक्नुभएको छ ।

आजको जनप्रदर्शन कात्तिक २९ गते जिल्लास्तरीय आमसभा, मंसिर ६ गते काठमाडौँमा हुने जनप्रदर्शन र आगामी महाधिवेशनको प्रचारको रुपमा पनि रहने कोशी प्रदेश प्रचार विभाग प्रमुख लक्ष्मण तिवारीले बताउनुभयो।