_1692346234_1692579957_1696057934.jpg)
इटहरी । मोरङको पथरी शनिश्चरे वडा नं २ ले वडा भित्रका जेष्ठ नागरिकलाई तिर्थाटन भ्रमण गराएको छ ।
शनिबार वडा कार्यालयले वडा भित्र बसोबास गर्दै आइरहनुभएको ६८ वर्ष माथिका ७६ जना जेष्ठ नागरिकहरूलाई धनकुटाको भेडेटारस्थित पाथीभरा देवी मन्दिर र धरानको बुढा सुब्बा तथा रामधुनी मन्दिरमा दर्शन गराएको हो। जेष्ठ नागरिकहरूलाई धार्मिक भ्रमणका क्रममा स्वस्थकर खानाको पनि व्यवस्थापन भएको थियो।
सोहि भ्रमणका क्रममा पथरी नगर अस्पतालका स्वास्थ्यकर्मीहरू रञ्जना दहाल र रत्नकला गुरुङले वृद्धवृद्धाहरूको स्वास्थ्य सेवा प्रदान गर्नुभएको थियो। उक्त भ्रमणका लागि वडा कार्यालयले कुल १ लाख रुपैयाँ विनियोजन गरेको वडा अध्यक्ष नैना राईले बताउनुभयो।
वृद्ध वृद्धा आमा–बुबाहरूको लागि वडा सदस्यहरू क्रमशः खिलानाथ घिमिरे, अम्बिका लिम्बु र सीता भुसाल , लेखा कर्मचारी गोपाल खड्का सहित सक्रिय रूपमा खटिनुभएको थियो। यसैगरी, वडा नम्बर ८ ले पनि आइतबार धरानका विभिन्न मठमन्दिर र शक्ति पीठहरूमा वडाका जेष्ठ नागरिकहरूलाई तीर्थ भ्रमण गराएको थियो। वडा नम्बर ८ ले चतराधाम र बुढासुब्बा लगायतका मठ मन्दिरहरूमा दर्शन गराएको वडा कार्यालय जनाएको छ ।
