इटहरी : बिर्तामोड नगरपालिका - ९ मा न्वारानको भोज खाएका ठूलो संख्याका मानिसमा स्वास्थ्य समस्या देखिएको छ। मंगलवार स्थानीय रामकुमार श्रेष्ठको घरमा आयोजित न्वारानको भोजमा सहभागीमध्ये अधिकांशलाई पेट दुख्ने, वान्ता हुने, झाडापखालालगायतका समस्या देखिएपछि १२ जनालाई अस्पताल भर्ना गरिएको छ।

श्रेष्ठकी नातिनीको न्वारानका अवसरमा आयोजित भोजमा करिब ५० जना सहभागी भएको बताइएको छ। भोजमा सहभागीमध्ये एकपछि अर्को गर्दै स्वास्थ्य समस्या देखिन थालेपछि केहीले स्थानीयस्तरमै औषधि सेवन गरेका थिए। स्वास्थ्यमा सुधार नआएपछि उनीहरू अस्पताल पुगेका हुन्। अस्पताल भर्ना हुनेमध्ये आठ जनालाई बिर्तामोड नगर अस्पताल र चार जनालाई प्रादेशिक अस्पताल भद्रपुरमा उपचारका लागि लगिएको थियो। बिर्तामोड नगर अस्पतालमा भोजका घरधनी ५३ वर्षीय रामकुमार श्रेष्ठ, उनकी ४९ वर्षीया श्रीमती तारा श्रेष्ठ, १५ वर्षीया रुपा श्रेष्ठ, ४८ वर्षीया यमकुमारी प्रधान, २० वर्षीय रोमन श्रेष्ठ, इश्वरकुमार श्रेष्ठ, ५० वर्षीया फूलमाया श्रेष्ठ, ६३ वर्षीय हर्कप्रसाद श्रेष्ठ र ३२ वर्षीया बुनु श्रेष्ठ उपचारका लागि पुगेका थिए। उनीहरूमध्ये केही उपचारपछि घर फर्किसकेका छन्। प्रादेशिक अस्पताल भद्रपुरमा उपचारका लागि लगिएका चार जनालाई पनि स्वास्थ्यमा सुधार आएपछि डिस्चार्ज गरिएको जनाइएको छ। भोजमा सहभागी अन्य केही व्यक्तिले भने अस्पताल नगई स्थानीय फार्मेसीबाट औषधि खरिद गरेर सेवन गरिरहेका छन्। औषधि सेवन गर्दा पनि स्वास्थ्यमा सुधार नआए अस्पताल जानुपर्ने अवस्था रहेको रामकुमार श्रेष्ठले बताए।

कुखुराको मासुमाथि आशंका, पुष्टि हुन बाँकी

भोजमा सहभागीका लागि बिर्ताबजारस्थित गणेश फ्रेस हाउसबाट खरिद गरिएको कुखुराको मासु प्रयोग गरिएको बताइएको छ। भोजपछि सहभागीमा स्वास्थ्य समस्या देखिएपछि मासुका कारण यस्तो भएको हुन सक्ने आशंका गरिएको छ। तर, कुखुराको मासु नै बिरामीको कारण भएको भन्ने पुष्टि भने भइसकेको छैन। खाद्य प्रविधि तथा गुण नियन्त्रण कार्यालय झापाका अनुसार स्वास्थ्य समस्या देखिनुको वास्तविक कारण प्रयोगशाला परीक्षणबाट मात्रै यकिन हुनेछ। घटनाबारे जानकारी पाएपछि कार्यालय र बिर्तामोड नगरपालिकाको संयुक्त टोलीले खाद्य सामग्रीको अवस्थाबारे अनुगमन तथा नमुना संकलन थालेको छ। कार्यालयका अनुसार भोजमा प्रयोग गरिएको कुखुराको मासुसहित अन्य खाद्य सामग्रीको नमुना संकलन गरिएको छ। त्यसैगरी खाना पकाउन प्रयोग गरिएको तेलको नमुना पनि हल्दीबारीस्थित एक किराना पसलबाट संकलन गरिएको छ। संकलित नमुना प्रयोगशालामा परीक्षण गरेपछि स्वास्थ्य समस्या खानाजन्य विषाक्तता, दूषित खाद्य पदार्थ वा अन्य कारणले भएको हो भन्नेबारे निष्कर्ष निकाल्न सकिने कार्यालयले जनाएको छ।

फ्रेस हाउसमा सरसफाइको अवस्था कमजोर

घटना सार्वजनिक भएपछि बिर्तामोड नगरपालिका र खाद्य प्रविधि तथा गुण नियन्त्रण कार्यालय झापाको टोलीले बिर्ताबजारस्थित गणेश फ्रेस हाउसको अनुगमन गरेको छ। अनुगमनका क्रममा पसलमा सरसफाइको अवस्था सन्तोषजनक नरहेको पाइएको नगरपालिकाले जनाएको छ। खाद्य सामग्री बिक्री गर्ने स्थानमा आवश्यक सरसफाइमा ध्यान नदिएको पाइएपछि सञ्चालक गणेश श्रेष्ठलाई तत्काल सुधार गर्न निर्देशन दिइएको छ। बिर्तामोड नगरपालिकाका उपप्रमुख नगेन्द्रप्रसाद संग्रौलाका अनुसार पसलको सरसफाइ सुधारका लागि सञ्चालकलाई तीन दिनको समय दिइएको छ। तोकिएको अवधिमा सरसफाइमा सुधार नगरे आवश्यक कानुनी प्रक्रिया अघि बढाइने उनले बताए। खाद्य सामग्रीको गुणस्तर, भण्डारण र सरसफाइमा लापरबाही हुँदा खानाजन्य समस्या निम्तिन सक्ने भएकाले घटनालाई गम्भीर रूपमा लिएर आवश्यक नमुना परीक्षण तथा अनुगमन भइरहेको सम्बन्धित अधिकारीले बताएका छन्। अहिले अस्पतालमा उपचार गराइरहेका अधिकांशको अवस्था सामान्य रहेको जनाइएको छ। भोजमा सहभागी अन्य व्यक्तिमा पनि स्वास्थ्य समस्या देखिएको हुन सक्ने भएकाले उनीहरूको अवस्थाबारे समेत निगरानी आवश्यक देखिएको छ। प्रयोगशाला परीक्षणको प्रतिवेदन आएपछि मात्र भोजमा प्रयोग भएको कुन खाद्य सामग्रीका कारण समस्या उत्पन्न भएको हो भन्नेबारे यकिन हुने खाद्य प्रविधि तथा गुण नियन्त्रण कार्यालयले जनाएको छ।