इटहरी : भोटेकोसी नदीमा आएको विनाशकारी बाढीबाट प्रभावित परिवारको राहतका लागि झापा गोल्डकपले १ लाख १ हजार रुपैयाँ सहयोग गर्ने भएको छ।

झापा गोल्डकप सचिवालयको बिर्तामोडमा बसेको बैठकले बाढीबाट प्रभावित नागरिकको राहतका लागि गोल्डकपको कोषबाट उक्त रकम उपलब्ध गराउने निर्णय गरेको हो। बाढीका कारण ठूलो जनधनको क्षति हुनुका साथै कैयौँ परिवार विस्थापित भएको अवस्थामा पीडितको राहतमा सहयोग पुर्‍याउने उद्देश्यले रकम उपलब्ध गराउने निर्णय गरिएको गोल्डकपले जनाएको छ। देशकै प्रतिष्ठित फुटबल प्रतियोगिताका रूपमा स्थापित झापा गोल्डकपले खेलकुद गतिविधिसँगै सामाजिक उत्तरदायित्वलाई पनि प्राथमिकतामा राख्दै आएको छ। विपत्तिका बेला बाढीपीडितका लागि गरिएको सहयोगलाई पनि गोल्डकपले सामाजिक उत्तरदायित्वकै निरन्तरताका रूपमा लिएको छ।

झापा गोल्डकपका अध्यक्ष केदार गिरीले विपत्तिको समयमा गरिने सहयोग रकमको आकारभन्दा पीडितप्रतिको साथ र ऐक्यबद्धता महत्वपूर्ण हुने बताए। संकटमा परेका नागरिकको पीडामा साथ दिनु सबैको साझा दायित्व भएको उनको भनाइ छ। गोल्डकपले खेलकुदलाई केवल प्रतिस्पर्धा र मनोरञ्जनमा सीमित नराखी सामाजिक सरोकारका विषयमा पनि आफ्नो भूमिका स्थापित गर्नुपर्ने मान्यताका साथ सहयोगको निर्णय गरेको जनाएको छ। भोटेकोसी बाढीबाट प्रभावित परिवार राहत र पुनःस्थापनाको पर्खाइमा रहेका बेला झापा गोल्डकपको सहयोगले विपत्तिमा परेका नागरिकप्रति ऐक्यबद्धता जनाउने प्रयास गरेको छ।