इटहरी स् ‘हामी अहिले टिमुरे पुग्यौँ, अब १० मिनेटमा भोटेखोला पुग्छौँ।’  भोटेकोशीमा विनाशकारी बाढी आएको दिन गत बुधबार बिहान करिब ८ः४४ बजे सोमप्रसाद कट्टेलले परिवारलाई फोनमा भनेको यही वाक्य अहिले उनका आफन्तका लागि अन्तिम सम्झना बनेको छ।

त्यसपछि सोमप्रसादको फोन आएन।

विराटनगर महानगरपालिका–५ का सोमप्रसाद काठमाडौंस्थित सम्राट ट्राभल्स एन्ड टुरिजम ट्रेकिङ सेन्टरमा कार्यरत थिए। घुमफिरका लागि रसुवा पुगेका उनी भोटेकोशीमा आएको भीषण बाढीपछि सम्पर्कविहीन छन्। बाढी आएको दिनदेखि उनको अवस्था अज्ञात छ।सोमप्रसादसँगै उनका भान्जा बेलबारी नगरपालिका–११ का अनोज धमला पनि रसुवा पुगेका थिए। बाढी प्रभावित क्षेत्रमा पुगेपछि दुवै जना सम्पर्कविहीन बने। सोमप्रसादकी भाउजू कुन्ता कट्टेलका लागि बुधबार बिहानको त्यो फोन अहिले पनि कानमा गुञ्जिरहेको छ। ‘उहाँले हामी टिमुरे पुग्यौँ, अब १० मिनेटमा भोटेखोला पुग्छौँ भन्नुभएको थियो। त्यसपछि फोन सम्पर्क नै हुन सकेन,’ कुन्ताले भनिन्। सुरुमा परिवारले उनीहरू सुरक्षित स्थानमा पुगेको हुनसक्ने अनुमान गरेको थियो। बाढीका कारण मोबाइल सम्पर्क अवरुद्ध भएको हुनसक्ने ठानियो। तर, घण्टा बित्दै गए। दिन बित्दै गए। फोन आएन। आशा बिस्तारै चिन्तामा बदलियो।

आफन्त खोज्दै धुन्चेदेखि देवघाटसम्म

सोमप्रसादको खोजीमा परिवारका सदस्य सम्भावित सबै ठाउँमा पुगेका छन्। उनका भाइ लेखनाथ कट्टेल रसुवाको धुन्चेसम्म पुगे। सम्भावित स्थानमा खोजी गरे। तर, सोमप्रसादबारे कुनै ठोस जानकारी भेटिएन। उनका दाजु पशुराम कट्टेल भने चितवनको देवघाटसम्म पुगे। त्यहाँ बाढीपहिरोमा मृत्यु भएकाको शव राखिएको र फरेन्सिक परीक्षण तथा डीएनए नमुना संकलन भइरहेको जानकारी पाएपछि उनी देवघाट पुगेका थिए। तर, डीएनए परीक्षणको नतिजा नआएसम्म शव कसको हो भन्ने यकिन हुन सकेन। त्यसपछि उनी फर्किए।  अब परिवारको अर्को प्रतीक्षा डीएनए परीक्षणको नतिजा बनेको छ। त्यो नतिजाले सोमप्रसादको अवस्थाबारे केही जवाफ दिनेछ। परिवारका लागि भने त्यो जवाफ कस्तो हुनेछ भन्ने अनिश्चितताले झन् बेचैन बनाएको छ।

‘लास भेटिन्छ कि साससहित फर्किन्छन्’

सोमप्रसादको परिवार अहिले एउटा आशा र एउटा डरबीच उभिएको छ। ‘लास भेटिन्छ कि साससहित फर्किन्छन् भन्ने आशामा छौँ,’ परिवारको भनाइ छ। उनी जीवितै भेटिएर घर फर्किऊन् भन्ने आशा अझै बाँकी छ। तर, अप्रिय अवस्था भइसकेको भए पनि कम्तीमा शवको पहिचान होस् र अन्तिम संस्कार गर्न पाइयोस् भन्ने चाहना पनि परिवारले राखेको छ। अहिले परिवारका लागि सबैभन्दा ठूलो प्रश्न एउटै छ– सोमप्रसाद कहाँ छन्रु प्रत्येक पटक फोनको घण्टी बज्दा परिवारले सुखद खबरको अपेक्षा गर्छ। तर, अहिलेसम्म त्यो प्रतीक्षा पूरा भएको छैन।

मामा–भान्जाको एउटै खोजी

सोमप्रसादसँगै उनका भान्जा अनोज पनि बेपत्ता भएपछि बेलबारीमा रहेको अनोजको परिवार पनि उस्तै पीडामा छ। दुवै जना घुमफिरका लागि रसुवा पुगेका थिए। भोटेकोशीको बाढीपछि उनीहरूको मोबाइल सम्पर्क टुट्यो। त्यसयता परिवारले विभिन्न माध्यमबाट खोजी गरिरहेको छ। बाढीले सम्पर्कविहीन बनाएका व्यक्तिको संख्या र अवस्था यकिन गर्ने काम चुनौतीपूर्ण भइरहेका बेला मामा–भान्जाको परिवार भने सम्भावित हरेक ठाउँमा खबर खोजिरहेको छ।

एउटा फोनको प्रतीक्षामा परिवार

भोटेकोशीको बाढीले धेरै परिवारलाई यस्तै अनिश्चित प्रतीक्षामा छाडेको छ। कतै आफन्तको फोन आउने आशा छ, कतै उद्धार गरिएकाको सूचीमा नाम भेटिने प्रतीक्षा। कतिपय आफन्त अस्पतालदेखि शव व्यवस्थापन गरिएका स्थानसम्म पुगेर आफ्ना मान्छेको खोजी गरिरहेका छन्। सोमप्रसादको परिवारका लागि भने बाढी आउनुअघि बिहान ८ः४४ बजे आएको त्यो फोन नै अहिले सबैभन्दा ठूलो सम्झना बनेको छ। ‘हामी अहिले टिमुरे पुग्यौँ, अब १० मिनेटमा भोटेखोला पुग्छौँ।’ त्यसपछि फोन आएन। सोमप्रसाद कहाँ पुगेरु अनोजसँग के भयोरु उनीहरू अहिले कहाँ छन्रु यी प्रश्नको उत्तर परिवारले अझै पाएको छैन। उत्तरको प्रतीक्षामा दिन बितिरहेका छन्। फोनको घण्टी बज्दा अझै परिवारको मनमा एउटै आशा जाग्छ(सायद सोमप्रसादकै फोन होला।