इटहरी । पाँचथरको फालेलुङ गाउँपालिका ४ स्थित चारराते क्षेत्रमा पर्यटकको आगमन बढ्न थालेको छ । पूर्वाधार विकास र सहज सडक सञ्जाल विस्तार भएपछि यहाँ आन्तरिक तथा बाह्य पर्यटकको आगमन बढ्न थालेको हो ।

विभिन्न कारणले प्रचार बढ्दै गएको चारराते क्षेत्रमा नेपाल र भारतबाट दैनिक ५०० जनासम्म पर्यटक यहाँ पुग्न थालेका फालेलुङ कञ्चनजङ्घा पर्यापर्यटन प्रवर्द्धन संस्थाका अध्यक्ष शिल्प साम्पाङ राईले जानकारी दिनुभयो । उहाँका अनुसार नेपाल९भारत सीमावर्ती क्षेत्रमा पर्ने चाररातेबाट हिमशृङ्खलाको दृश्यावलोकन, चौँरी तथा भेँडीगोठमा रमाउने अवसर, उच्च पहाडी क्षेत्रको अनुभव सङ्गाल्न पाइन्छ । 

मनोरम प्राकृतिक वातावरणमा रमाउन सकिने भएकाले चाररातेमा अहिले सयौँको सङ्ख्यामा पर्यटक आइरहेका अध्यक्ष राईले बताउनुभयो । उहाँका अनुसार अहिले फालेलुङको बाटो सहज भएकाले पनि दैनिक ३०० देखि ५०० जनासम्म आन्तरिक तथा बाह्य पर्यटक यहाँ पुगिरहेका छन । यहाँ पर्यटक पुग्नुको अर्को कारण सूर्यास्त र हिमश्रृङ्खलाको आकर्षक दृश्यावलोकन पनि हो । उहाँका अनुसार नेपाल, सिक्किम ९भारत० र भुटानका हिमालको दृश्यावलोकनका लागिसमेत चारराते क्षेत्र उपयुक्त मानिएको छ ।

नयाँ वर्षका दिन आयोजना हुने चौँरी महोत्सव, यहाँ छायाङ्कन भएको ‘उनको स्वीटर’ चलचित्र, सामाचार सामग्री तथा युट्युब, टिकटक, फेसबुकलगायत सामाजिक सञ्जालबाट भएको डिजिटल प्रचारका कारण पर्यटक आकर्षित भइरहेका घरबास सञ्चालक डिल्लीहाङ केरुङले बताउनुभयो । अहिले चाररातेसहित यहाँ रहेको नेपालको झण्डा आकारको झण्डा पोखरी, जलजले पोखरी, भैँसे पोखरी पनि पर्यटकको आकर्षण बनिरहेका छन् । समुन्द्र सतहदेखि तीन हजार ५०० मिटर उचाइमा अवस्थित चाररातेमा पाँचथरको फिदिमबाट प्राङबुङ हुँदै पर्यटक पुग्न सक्छन् भने इलामको सन्दकपुरबाट पनि यहाँ पुग्न सकिन्छ । नेपालतर्फबाट यस वर्ष अत्यधिक मात्रामा पर्यटक आएपछि स्थानीयवासी आर्थिक गतिविधि चलायमान हुने भन्दै उत्साहित भएका छन् ।

घरबास सञ्चालक केरुङका अनुसार यहाँबाट कञ्चनजङ्घा र कुम्भकर्ण हिमाल स्पष्टसँग देख्न सकिन्छ । सहज सडक पूर्वाधार विस्तार भएकाले दुईपाङ्ग्रे र चारपाङ्ग्रे सवारीसाधनबाट यहाँ पुग्न सकिने भएपछि पर्यटकको आगमन बढ्न थालेको केरुङको भनाइ छ । उहाँका अनुसार कात्तिक र मङ्सिर यस क्षेत्रको भ्रमणका लागि उपयुक्त यान मानिन्छ । विगत केही वर्षदेखि भारतको विभिन्न क्षेत्रका पर्यटकसमेत नेपालको बाटो हुँदै यहाँ पुग्न थालेपछि पर्यटनमा आधारित अर्थतन्त्र फस्टाउने र स्वरोजगारका अवसर सिर्जना हुने आशा पलाएको स्थानीय बताउँछन् । 

अहिले पर्यटकको सङ्ख्यामा वृद्धि हुँदा व्यवस्थापनमा भने कठिनाइ हुने गरेको घरबास सञ्चालकको भनाइ छ । सीमित घरबास र गोठबासमा पर्यटकलाई राख्नुपर्ने, खानेपानी र विद्युत् नियमित नहुने तथा वर्षा हुनासाथ सडक जोखिमपूर्ण हुने समस्याका कारण उचित व्यवस्थापनमा कठिनाइ भइरहेको घरबास सञ्चालक केरुङले बताउनुभयो ।